سبع أيام

اليوم الأول.
- أصل يبني صدقني ده الحل الوحيد..أصل العالم ده مش بيحترم غير القوي ها؟ فأحنا ايه نعمل شوية ناس من الي هما مؤمنين بفكرة الخلافة زيينا و علي الصحرا...هنستولي علي مكان هناك..و سلاح بقي و هنعمل حتي لينا احنا بس..و الي يقرب نقتله..
- يبني و هتجيب السلاح منين..
- يبني مفيش حد بيغلب طلاما عايز حاجة..
- طب أيه الفرق بينك و بين داعش كده؟
- لا داعش دول طيبين..و بتوع محاكم شرعية و بتاع..أحنا هنخلص علي طول
- ماشي..
- بص..ممكن تاخدني علي قد عقلي براحتك..بس هتشوف..مسيري في يوم هعمل كده...

اليوم التاني.
- أنا بدأت أجهز للي بقولك عليه علي فكرة..
- تجهز أزاي يعني يبني؟
- هبدأ أدرب و أقول لناس علي الفكرة...
- يبني بطل هبل والله.
- أنت بس عشان مش عارف تعمل زيي بتقول كده..

اليوم التالت.

- بوقلك أيه..أنا حاسس أني متلخبط جدا في حياتي...مش عارف أعمل أيه؟
- ليه بس..احكيلي..
- مش عارف...كل حاجة حواليا متلخبطة...أنا مش فاهم حاجة بجد..
- مش فاهم حاجة في أيه ؟
- في كل حاجة...في كل حاجة..
- طب روق كده..مسيرها تظبط.

اليوم الرابع.
- بقولك ايه..كايروكي عاملين حفلة في ساقية الصاوي..ما تيجي نروح؟
- حفلة؟ أنت من أمتي بتحب كايروكي أصلأ؟ و من أمتي بتروح حفلات..
- فيها أيه يعني؟
- مفهاش...بس مش جوك يعني...
- عادي يا عم عايز أروح..
- طيب.

اليوم الخامس.
- عارف؟ تفتكر ربنا عدل بالي بيعمله في الناس ده؟ أنا السؤال ده عاملي كالوه في دماغي بقاله كتير..
- بيعمل ايه في الناس ربنا ؟
- قصدي يعني..احنا العالم ده وحش اوي..كله حاجات وحشة و ظلم و قهر..
- مش أوي يعني...أحنا بس عشان عايشين في مكان كله كده..
- لا والله..الكلام ده في كل حتة.
- فكك...ربنا موجود..و بيهونها..
- منا عارف انه موجود يبني..بس بيهونها فعلا؟
- مممم...مش عارف...هيهونها يمكن..

اليوم السادس.
- أنت أيه فكرتك عن الجنة ؟
- مش عارف اوي...مفكرتش في الموضوع ده كتير...يمكن عشان دايما متصور أنها حاجة مش هعرف أتخيلها..
- عارف ؟ أنا فكرتي عن الجنة هي كل الحاجات الي لو عملتها هخش النار...يعني عايز الجنة تبقي فيها أنهاااار خمرة كتييير و حور عين و ستات حلوين كتير...و حشييش كتيير..طب ما أعمل الحاجات دي في الدنيا من دلوقتي و أبقي دخلت الجنة بدري بدري..
- هاهاهاها بس يلا.
- بكلم بجد.

اليوم السابع.
- أنا مش متخيل بجد ازاي الناس بتدبح الخرفان بالسهولة دي؟ بينهوا حياة روح بالسهولة دي..
- يبني أذا كان بيقتلوا بني أدمين بالسهولة دي..مش هنقتل خرفان؟
- بس الدبح غير..
- داعش بتدبحهم عادي..
- داعش دول ولاد وسخة أوي.

سبع حوارات مع صديق أعرفه...نفس الشخص..نفس الشخص هو هو...بس مخه مقاش هو هو...شخص في ظرف مدة قصيرة جدا جدا..قدر دماغه تتحول من حتة..لحتة تانية خالص..مع الأيمان بما لم يكن يؤمن به و الكفر بما كان يؤمن به أو في بعضه....معرفش حتي الأن هل تحول هذا الصديق من سئ لأحسن أو من أحسن لأسوء..كل الي أعرفه أنه أتحول...
تحولات الأنسان الفكرية في مدة قصيرة مرعبة..مرعبة جدا..فبين ليلة و ضحاها بيبقي شخص تاني...لو مخدش باله من تحولاته الفكرية و عرف هندلها هيقع..أو هيتسوح..أيهما أقرب.

ماكدونلز ولا برجر كينج ؟

- أصل يبني بص..أسمع مني بس أقسم بالله برجر كينج طعمه أحسن من ماكدونلز بكتير..لا والله مش هاكل في ماكدونلز أيه الخرا ده!
- هو أنت بتزعق ليه؟
- أصل يا عم طعمه وحش أوي و أنا زهقت منه كل مرة بناكل فيه..
- أحمد!
- أيوة؟
- بتزعق ليه؟
- عشان أنا بقولك أن برجر كينج أحسن من ماكدونلز و أنت مش راضي تسمع!
- طب و دي حاجة تستاهل انك تزعق.
- يا اخي أنت مالك أنا بحب أزعق..ده أيه ده!
___________________

حوار بسيط كان بيني و بين واحد صاحبي....حوار تافه يدل علي أن أحنا ناس مورهاش حاجة تعملها في حياتها حرفيا...بنكلم في أنهي أحسن..برجر كينج و لا ماكدونلز...
و مش عايز أتقمص دور حكيم القرية فعلا بس ده بقي أحساسي ناحية أي حاجة بتحصل حواليا في الحياة..
" أنتوا بتزعقوا ليه يا جدعان ؟ "
مبقتش عندي أي أحساس أن في حاجة مستاهلة نزعق عشانها..و بقول كده و أنا معنديش أي نوع من أنواع الأكتئاب أو الضيق.بالعكس..أنا فرحان الحمدلله و الدنيا كويسة معايا..بس أنتو بتزعقوا ليه ؟
كل واحد يقتنع برأي يزعق في التاني..في الحقيقة لو بصينا للعالم هنلاقي أن  أي حاجة بتحصل عبارة عن زعيق و خناقة كبيرة..
كل واحد متعصب لرأيه راح دور علي الناس المتعصبين لنفس الرأي و عملوا جماعة سموها بأسم الرأي ده و قعدوا يزعقوا...و في جماعة تانية متعصبين لرأي أخر جمعوا بعض و قعدوا يزعقوا برضو..و النتيجة من زعيق الجماعتين أو الجماعات هو شوية مشردين علي قتلي علي لاجئين علي مصابين علي ناس مشوعة نفسيا..يعني ممكن نقول أن الحروب العالمية كانت جماعتين بيزعقوا قدام بعض بدأت بأن في أتنين بدأو يزعقوا بصوت عالي..لسوء الحظ الأتنين دول كانوا رؤساء دول...لو كانوا غسالين صحون في أحدي مطاعم حواري فينسيا مكانش حد أهتم خالص...
مش عارف لو قارنا عالم الزعيق ده بجبلاية القرود هيكون ظلم لجبلاية القرود ولا لأ..أظن أن القرود بياخدوا راحة من الزعيق علي فترات..لكن أحنا الحمدلله ما شاء الله علينا بنزعق علي طول...لولا حاجة..غير يا أخي أنت مالك أنا بحب أزعق!

- يبني...يبني...
- أيه ؟
- يعني هنعمل أيه دلوقتي ماكدونلز و لا برجر كينج؟
- ما أنا قولتلك مية مرة برجر كينج البطاطس بتاعته وحشة..
-يووووه...أهو أنت كده كل حاجة عايزها تمشي زي ما تحب..